Қазақ өнерінің корифейі, КСРО және Қазақстанның Халық әртісі, Еңбек Ері Асанәлі Әшімов өмірден озды. Ұлттық кино мен театр өнерінің сом алтыны, миллиондаған көрерменнің сүйіктісіне айналған абыз ақсақалдың дүниеден өтуі – қазақ руханияты үшін орны толмас ауыр қайғы.
Марқұмның ғибратты ғұмыры мен шығармашылық жолы – тұтас бір дәуірдің шежіресі іспетті. 1937 жылы Жамбыл облысында дүниеге келген Асанәлі Әшімов саналы ғұмырын қазақ өнерінің өркендеуіне арнады. Оның есімі аталғанда көз алдымызға алдымен әйгілі «Қыз Жібек» фильміндегі Бекежан мен «Атаманның ақыры», «Транссібір экспресі» трилогиясындағы барлаушы Қасымхановтың бейнесі келеді. Ол тек актер ретінде ғана емес, режиссер ретінде де «Жаушы», «Қозы Көрпеш – Баян Сұлу» сынды шоқтығы биік туындыларды дүниеге әкеліп, ұлттық кинематографияның алтын қорын байытты.
Сахна саңлағының М.Әуезов атындағы академиялық драма театрындағы еңбегі де ұшан-теңіз. Ол театр сахнасында елуден астам күрделі рөлдерді сомдап, көрерменнің ыстық ықыласына бөленді. Асанәлі Әшімовтың өнері шекара таңдамады, оның талантын әлем мойындады. Мемлекет тарапынан да абыз ақсақалдың еңбегі жоғары бағаланып, «Қазақстанның Еңбек Ері» атағымен, «Отан» орденімен және Мемлекеттік сыйлықтармен марапатталған болатын. Алайда, оның ең биік марапаты – халықтың шексіз махаббаты мен құрметі еді.
