Ақмолада көктемгі егіс науқаны сәтті аяқталды. Өңір еліміздің солтүстік облыстары арасында алғашқылардың бірі болып дала жұмыстарын толық аяқтап, жаңа ауыл шаруашылығы маусымына сенімді қадам басты. Бұл нәтижеге дер кезінде жүргізілген дайындық жұмыстары, мемлекеттік қолдау шаралары және аграршылардың үйлесімді еңбегі арқасында қол жеткізілді.
Егіс алқаптарының көлемі және әртараптандыру
Ақмола облысының Ауыл шаруашылығы және жер қатынастары басқармасының мәліметінше, биыл өңірдегі жалпы егіс алқабы 77 мың гектарға ұлғайып, 5,6 миллион гектарды құрады. Сонымен қатар егіс құрылымын әртараптандыру бағытындағы жұмыстар жалғасуда.
Соңғы 3 жылда бұл дақылдардың көлемі 6 есеге өсіп, 715 мың гектардан асты. Мал азықтық дақылдар 166,5 мың гектар жерге орналастырылды. Ал картоп пен көкөніс 10 мың гектардан астам алқапқа егілді.
Материалдық-техникалық дайындық және тыңайтқыштар
Өңірде егіс науқанына дайындық жұмыстары алдын ала жүргізіліп, барлық қажетті ресурстар уақытылы қамтамасыз етілді. Басқарма басшысы Нұрбек Бадырақов науқанның барысын атап өтті:
«Егіс науқанының табысты өтуіне материалдық-техникалық базаның жүз пайыз дайын болуы ықпал етті. Ауыл шаруашылығы тауарын өндірушілер тұқым материалдарымен және жеңілдетілген дизель отынымен толық қамтамасыз етілді. Топырақ құнарлылығын арттыру мақсатында аграршылар 330 мың тонна минералды тыңайтқыш енгізді. Сонымен қатар өңірдегі ауыл шаруашылығы құрылымдары өсімдіктерді қорғау құралдарымен толық қамтылды».
Мемлекеттік қолдау және жеңілдетілген несиелеу
Ауыл шаруашылығы саласын қолдау мақсатында биыл жеңілдетілген несиелеу мен субсидиялау аясында 235 миллиард теңгеден астам қаржы бөлінді. Қаржыландырудың негізгі бағыттары:
Көктемгі егіс және егін жинау жұмыстарын жүргізуге 840 ауыл шаруашылығы тауарын өндірушіге 122 миллиард теңге көлемінде қаржы қарастырылды. Жыл басынан бері шаруалар 789 жаңа техника сатып алды. Ал отандық өндірістегі техниканы жеңілдетілген лизингке беру бағдарламасы арқылы «ҚазАгроҚаржы» АҚ көмегімен 610 техника сатып алу жөнінде келісімдер жасалды.
«Азық-түлік корпорациясы» ҰК» АҚ жүзеге асыратын Форвардтық сатып алу бағдарламасы аясында жалпы құны 4,2 миллиард теңге болатын келісімшарттар 38 ауыл шаруашылығы тауарын өндірушімен жасалды. Қазіргі таңда жалпы сомасы 3,3 миллиард теңге болатын 55 өтінім қаржыландырылды. Бұл 59 мың тонна ауыл шаруашылығы өнімін жеткізуге мүмкіндік береді.
Мамандардың айтуынша, егіс науқанының агротехникалық талаптарға сай және қолайлы мерзімде аяқталуы болашақ өнімнің сапасы мен көлеміне оң әсер етеді. Сондай-ақ бұл өңірдің агроөнеркәсіптік кешенін дамытуға және ауыл шаруашылығының бәсекеге қабілеттілігін арттырудың тиімді жолы.
Израиль парламенті өзін-өзі тарату туралы шешім қабылдай ма? — jananews.kz
