Мемлекет басшысы Қасым-Жомарт Тоқаев ресми сапармен келген Бельгия Королі Филипп пен Патшайым Матильдамен бірге Астанадағы Ұлттық балаларды оңалту орталығына барды, деп хабарлайды jananews.kz.
Заманауи оңалту әдістері
Мәртебелі меймандар ерекше қажеттіліктері бар балаларға көрсетілетін кешенді көмек пен орталықтың жұмысымен танысты. Меймандарға медициналық оңалту, психологиялық-педагогикалық қолдау және әлеуметтік бейімдеудің озық тәсілдері көрсетілді. Атап айтқанда, балалардың жеке оңалту бағдарламаларында заманауи роботтандырылған технологиялардың белсенді қолданылатыны айтылды.
Сапар барысында Король мен Патшайым орталықта ем қабылдап жатқан балалармен, олардың ата-аналарымен және білікті медицина қызметкерлерімен әңгімелесіп, интерактивті бағдарламаға қатысты. Соңында Құрметті қонақтар кітабына естелік жазба қалдырды.
Айта кетейік, бұл бірегей орталық жыл сайын Қазақстанның түкпір-түкпірінен келген 5 мыңнан астам балаға сапалы оңалту көмегін көрсетеді. Мемлекеттер басшыларының деңгейіндегі мұндай сапарлар инклюзивті қоғамды дамыту мен әлеуметтік салаға қолдау көрсетудің маңыздылығын тағы бір мәрте айқындай түседі.
Шығыс Қазақстанда үш ауылдың су станциялары сүзгісіз жұмыс істеген — jananews.kz
