Қазақстан Республикасының Су ресурстары және ирригация министрі Нұржан Нұржігітов БҰҰ-ның Еуропалық экономикалық комиссиясы (ЕЭК) атқарушы хатшысының орынбасары Дмитрий Марьясинмен ресми кездесу өткізді. Жүздесу барысында тараптар су саласындағы екіжақты ынтымақтастықтың келешегін және Мемлекет басшысы Қасым-Жомарт Тоқаевтың БҰҰ құрылымы аясында Халықаралық су ұйымын құру жөніндегі маңызды бастамасын жан-жақты талқылады.
Президент бастамасының халықаралық қолдау табуы
Нұржан Нұржігітовтің мәлімдеуінше, Қазақстан Президентінің халықаралық ұйым құру туралы бастамасы шетелдік әріптестер тарапынан жоғары қызығушылық тудырып, оң бағаланған:
Бұл бастама Астанада өткен Өңірлік экологиялық саммит аясындағы консультацияларға қатысушылар тарапынан үлкен қолдау тапты. Аталған алғашқы консультациялық жиынға әлемнің 30-дан астам мемлекеті мен 20 халықаралық ұйымынан шамамен 140-қа жуық ресми өкіл қатысқан. Қазіргі уақытта үстіміздегі жылдың шілде айында Нью-Йорк қаласында ұйымдастырылатын БҰҰ-ның Тұрақты даму жөніндегі жоғары деңгейлі саяси форумы алаңында халықаралық консультациялардың 2-кезеңін өткізу мүмкіндігі қарастырылып жатыр.
Су қауіпсіздігі және халықаралық ынтымақтастықтың маңызы
Су ресурстары және ирригация министрі Нұржан Нұржігітов БҰҰ Еуропалық экономикалық комиссиясының Орталық Азия аймағындағы су мәселелерін шешудің орнықты тәсілдерін ілгерілету және өңірлік ынтымақтастықты нығайту бағытында көрсетіп келе жатқан тұрақты қолдауы үшін айрықша алғыс білдірді. Министр өз сөзінде халықаралық әріптестіктің маңызына тоқталды:
«Қазақстан ЕЭК-пен әріптестікті жоғары бағалайды және оның қызметіне қатысуды елдің су қауіпсіздігін нығайтудың маңызды тетігі ретінде қарастырады. Қазіргі таңда су ресурстарына қатысты сын-қатерлердің күшеюі жағдайында халықаралық өзара іс-қимылдың, сараптамалық және әдістемелік қолдаудың маңызы артып келеді. Сонымен қатар су саласындағы халықаралық бастамаларды ілгерілету үшін БҰҰ Еуропалық экономикалық комиссиясымен ынтымақтастық әлеуетін тиімді пайдалануға мүдделіміз».
