Қазақстанның тау-кен металлургия саласындағы флагманы – «Қазақмыс корпорациясы» басшылығында маңызды өзгеріс болды. Кәсіпорынның басқарма төрағасы қызметіне білікті топ-менеджер, өндірістік және стратегиялық басқару саласында мол тәжірибе жинақтаған Руслан Өскенәлі тағайындалды. Жаңа басшы бүгіннен бастап ресми түрде қызметіне кірісті.
Руслан Өскенәлі – салаға жат адам емес. Оның кәсіби жолы отандық және халықаралық ірі өндіріс ошақтарымен тығыз байланысты. 1984 жылы дүниеге келген ол Әл-Фараби атындағы Қазақ ұлттық университетін «Халықаралық құқық» мамандығы бойынша бітірген. Кейіннен басқарушылық дағдыларын шыңдау мақсатында АҚШ-тың Woodbury University жоғары оқу орнында іскерлік әкімшілендіру магистрі (MBA) дәрежесін иеленді. Бұл академиялық база оған өндірістік процестерді заңдық және экономикалық тұрғыдан сауатты үйлестіруге мүмкіндік береді.
Жаңа басшының еңбек өтіліне үңілсек, оның трансұлттық корпорациялардағы жұмыс тәжірибесі ерекше назар аудартады. Әр жылдары ол Alstom және General Electric (GE) сынды әлемдік гиганттарда, сондай-ақ дәл осы «Қазақмыс» құрылымында жауапты басшылық қызметтер атқарған. Яғни, ол корпорацияның ішкі жүйесін жақсы білетін, сонымен қатар сырттан озық тәжірибе әкеле алатын кадр ретінде бағаланып отыр.
Осы тағайындауға дейін, 2024 жылдың наурыз айынан бастап Руслан Өскенәлі Qarmet металлургиялық компаниясында (бұрынғы ArcelorMittal Temirtau) Жабдықтау жөніндегі директор және Басқарма мүшесі қызметін атқарды. Qarmet-тегі қысқа бірақ нәтижелі кезеңде ол сатып алу жүйесін стратегиялық тұрғыдан қайта құрып, жабдықтау процесін оңтайландыруда және компанияның операциялық қызметін жақсартуда жоғары тиімділік көрсетті. Оның Qarmet-тегі дағдарыс-менеджменті мен жүйелі жұмысы «Қазақмыс» акционерлерінің сеніміне ие болуына негіз болғандай.
Сарапшылардың пікірінше, Руслан Өскенәлінің «Қазақмысқа» келуі компанияның даму стратегиясына жаңа серпін бермек. Оның алдында өндіріс көлемін арттыру, еңбек қауіпсіздігін күшейту және корпоративтік басқарудың халықаралық стандарттарын енгізу сияқты ауқымды міндеттер тұр. Топ-менеджер өзінің тиімділіктің жоғары стандарттарына (KPI) адалдығымен және ұжымдағы кадрлық әлеуетті дамытуға деген ұмтылысымен танымал.
