Қазақстандағы жан басына шаққандағы ІЖӨ болжамы
ХВҚ деректері бойынша Қазақстанның әлемдік рейтингтегі позициясы алдағы онжылдықта жақсара түседі. Қордың бағалауынша, 2026 жылы Қазақстандағы жан басына шаққандағы ІЖӨ көлемі 17,5 мың доллар болады. Бұл көрсеткіш бойынша ел Сейшел аралдары мен Сербияның арасында орналасады. Ал 2031 жылға қарай бұл көрсеткіш 23,17 мың долларға дейін өседі деп күтілуде. Осы нәтиженің арқасында Қазақстан әлемдік рейтингте 71-орыннан 68-орынға көтеріліп, Оман мен Түркияның арасынан орын алуы мүмкін. Алдағы бес жылда бұл көрсеткіш 32,4 пайызға немесе абсолюттік мәнде 5,67 мың долларға өседі деп болжануда. Бұл өсу қарқыны бойынша республика әлем елдері арасында 43-орында тұр.
Аймақтағы және әлемдегі жағдай: Салыстырмалы сараптама
ХВҚ болжамы көршілес елдер мен әлемдік көшбасшылар арасындағы айырмашылықты да айқындап берді. Аймақтағы мемлекеттердің ішінде Ресей 2026 жылы 18,53 мың доллармен 69-орында тұрса, 2031 жылға қарай 18,48 мың доллармен 78-орынға төмендеуі ықтимал. Қытай 2026 жылы 14,87 мың доллармен 78-орынға жайғасса, 2031 жылы 19,88 мың доллармен 74-орынға жақындайды. Өзбекстанда бұл көрсеткіш 4,66 мың доллардан 7,06 мың долларға дейін артып, рейтингте 121-орынға көтеріледі деп күтілуде. Ал Қырғызстан 3,2 мың доллар көрсеткішімен 142-орында қала береді.
Әлемдік рейтингте көш басында Лихтенштейн тұр, онда жан басына шаққандағы ІЖӨ көлемі 226,81 мың долларды құрайды. Бұл Қазақстан көрсеткішінен шамамен 13 есе жоғары және ХВҚ дерегіне сәйкес, бұл ел 2031 жылы да өзінің көшбасшылық орнын сақтап қалады. Ең төменгі көрсеткіш Йемен елінде тіркелген, мұнда бір адамға шаққандағы ІЖӨ көлемі небәрі 383,75 доллар ғана және ол алдағы уақытта да соңғы орында қала бермек. Айта кетейік, Халықаралық валюта қорының Қазақстанмен ынтымақтастығы нығайып келеді, соның дәлелі ретінде жақын арада Алматыда ХВҚ-ның өңірлік даму орталығы ашылады деп жоспарлануда.
