Қытай Халық Республикасында жасанды интеллект пен робототехника саласын құқықтық реттеу бағытында әлемдік деңгейде теңдесі жоқ бірегей жоба қолға алынды. Ел аумағында өндірілетін және қолданылатын роботтарға арнайы цифрлық «төлқұжаттар» үлестіріле бастады.
Бұл бастама «бір робот — бір код» қағидатына негізделген. Сонымен қатар жоба ақылды машиналарды пайдаланудың барлық кезеңдерін толықтай бақылауда ұстауға және құқықтық жауапкершілікті нақты бөлуге кең мүмкіндік береді,- деп хабарлайды kazinform.
Төрт деңгейлі бірегей код құрылымы
Жаңа жүйеде қолданылатын ID-аутентификация роботтың бүкіл өмірлік цикліне арналған жалғыз әрі бірегей нөмір болып табылады. Бұл құжат құрылымы жағынан қарапайым азаматтардың жеке сәйкестендіру нөміріне (ЖСН) өте ұқсас жасалған. Әрбір роботқа берілетін идентификациялық код арнайы төрт деңгейлі тексеру құрылымынан тұрады. Олар: робот шығарылған немесе тіркелген мемлекеттің ресми коды, құрылғыны құрастырған нақты өндіруші кәсіпорынның мәліметтері, ақылды техниканың нақты шыққан өнім моделі және құрылғының зауыттан берілген жеке сериялық нөмірі.
Бақылаудың тиімділігі және өндірістік жеңілдіктер
Енгізілген заманауи цифрлық ID арқылы кез келген роботтың техникалық қызмет көрсету тарихын, жұмыс журналдарын және орын алған түрлі ақаулар туралы мәліметтерді жедел түрде электронды форматта көруге болады. Бұл озық жүйе техникалық ақаудың нақты себебін жылдам анықтауға және оған жауапты тарапты дәл белгілеуге көмектеседі.
Сонымен қатар жаңа цифрлық жүйе өндірістік роботтарды түрлі кәсіпорындар мен зауыттар арасында қосымша қайта тексерулерсіз-ақ жеңіл тасымалдауға жағдай жасайды. Бұл маңызды қадам жаңа техниканы өндіріске енгізу және пайдалануға берегу уақытын айтарлықтай қысқартып, өндіріс тиімділігін арттырады.
