Оңтүстік Кореяда бұрын-соңды болмаған рекордтық аптап ыстықтан ауыл шаруашылығы саласы орасан зор зардап шегуде.
Азияның басым бөлігін шарпыған аномальды жоғары температура салдарынан фермерлердің картоп өнімдері жер астында пісіп, қайнап кетуде. The Guardian басылымының хабарлауынша, Сеулден солтүстік-шығысқа қарай 130 шақырым қашықтықта орналасқан Канвон провинциясының Янгу округіндегі шаруалар егістіктен жарамды өнім таппай отыр.
42,5°C тарихи рекорд және ауыл шаруашылығындағы шығын
Елдегі метеорологиялық ахуал соңғы 120 жылдағы ең қауіпті деңгейге жетті. 2-тамызда елдің оңтүстік-шығысындағы Янсан қаласында сынап бағанасы 42,5°C-қа жетті. Бұл — Оңтүстік Кореяда 1904 жылдан бері жүргізіліп келе жатқан заманауи бақылау тарихындағы ең жоғары температуралық көрсеткіш. Топырақ температурасының күрт қызуы салдарынан бір апта бұрын ғана бітік шыққан картоп алқаптары шіріп, жаппай жарамсыз күйге түсті. Ұлттық ауруларды бақылау агенттігінің мәліметінше, аптап ыстық салдарынан 900 000-нан астам мал қырылып, 1,4 миллион балық өлген.
Аномальды ыстық тұрғындардың денсаулығына да ауыр қатер төндірді. Ел аумағында аптап ыстықтың салдарынан кем дегенде 31 адам көз жұмды. Билік органдары дабыл қағып, тұрғындарды ашық ауадағы кез келген физикалық белсенділік пен іс-шараларды дереу тоқтатуға шақырды.
Елімізде мобильді құрылғыларды сату ережелері өзгереді — jananews.kz
