Елімізде мал шаруашылығы қарқынды дамып, соңғы жылдары барлық негізгі бағыттар бойынша айтарлықтай өсім тіркелді.
ҚР Ауыл шаруашылығы министрлігінің мәліметінше, Қазақстан жылқы саны жөнінен әлемдегі алдыңғы қатарлы 5 елдің қатарына енді, деп хабарлайды jananews.kz.
Мал шаруашылығындағы көрсеткіштер мен өсім динамикасы
Жылқы саны бойынша Мексика, Бразилия, Қазақстан, Моңғолия және Қытай елдері алғашқы бестікке енді. Ведомство деректеріне сәйкес, 2019–2026 жылдар аралығында еліміздегі түлік түрлері төмендегідей өсімді көрсетті:
Ең үлкен өсім дәл осы салаға тиесілі. Елдегі жылқы саны 58,6%-ға артып, 2,9 млн-нан 4,6 млн басқа дейін көбейді.
Ірі қара мал 10,8%-ға өсіп, 7,4 миллионнан 8,2 миллион басқа жетті.
Қой мен ешкі 7,8%-ға ұлғайып, 19,2 миллионнан 20,7 миллион басқа артты.
Құс саны 9,1%-ға көбейіп, 45 миллионнан 49,1 миллион басқа жетті.
Ал 2026 жылғы 1 қыркүйектегі ресми жағдай бойынша мал басының жалпы саны тіпті жоғары көрсеткіштерді көрсетті: ірі қара мал – 9 млн бас, қой мен ешкі – 23,3 млн, құс – 47,8 млн, жылқы – 4,9 млн, ал түйе саны 310,9 мың басқа жетті.
Өнім өндіру көлемі және алдағы міндеттер
Биылғы жылдың қаңтар-тамыз айларында республика бойынша өндірілген өнім көлемі де артқан. Тірі салмақтағы ет – 1,2 млн тонна, сүт – 2,7 млн тонна, ал жұмыртқа – 3,2 млрд дананы құрайды. Ауыл шаруашылығы министрлігі алдағы уақытта да мал басының өнімділігін арттыруға, селекциялық-асылдандыру жұмыстарын жетілдіруге, жемшөп базасын нығайтуға және қайта өңдеу қуаттарын кеңейтуге басымдық беретінін атап өтті. Басты мақсат – тауарлы өнім көлемін ұлғайтып қана қоймай, оның сапасы мен аграрлық сектордың экономикалық тиімділігін арттыру.
Қазақстанда пастерленген түйе сүтіне арналған алғашқы ұлттық стандарт бекітілді — jananews.kz
