Қазақстан үшін 25 қазан – ерекше маңызға ие басты тарихи күн. Бұл мереке алғаш рет 1992 жылы бекітіліп, жылдар бойы атап өтілді.
Кейін уақытша күші жойылғанымен, халық жадындағы қадір-қасиетін жоғалтқан жоқ. Араға жылдар салып, бұл атаулы күн мемлекеттік деңгейде қайта жаңғырды, — деп хабарлайды jananews.kz. Мемлекет басшысы Қасым-Жомарт Тоқаев 2022 жылы Ұлттық құрылтайда Республика күніне ұлттық мереке мәртебесін беруді ұсынды. Осы бастамадан кейін Парламент «Қазақстан Республикасындағы мерекелер туралы» заңға тиісті түзетулер енгізіп, 25 қазанды ресми түрде Ұлттық мереке етіп бекітті.
Тарихи декларация және оның мәні
Республика күні 1990 жылы Қазақ Кеңестік Социалистік Республикасының Мемлекеттік егемендігі туралы декларация қабылданған күнмен тікелей байланысты. Дәл осы маңызды құжат арқылы еліміздің тәуелсіз мемлекет болуға қарай алғашқы ресми қадамы жасалды. Декларацияның қабылдануымен мынадай негізгі қағидаттар бекітілді:
— Қазақстанның жеке аумағы мен азаматтығы;
— Дербес мемлекеттік бюджет;
— Халықаралық қатынастардағы дербестік;
— Тұңғыш рет бекітілген мемлекеттік рәміздер.
Осылайша, еліміздің саяси, құқықтық және экономикалық тұрғыдан егемендігі мен аумақтық тұтастығы дәйектелді.
Халық жадындағы ұлттық жаңғыру
Арадағы үзіліс жылдарында ресми тойланбаса да, бұл күнді халық әрдайым ерекше мақтаныш сезіммен атап өтті. Қоғамдағы ортақ үннің нәтижесінде мереке өз орнына қайта оралып, мемлекетіміздің қалыптасу жолындағы тарихи қадамның символына айналды. Бүгінде 25 қазан – еліміздің бірлігі мен тәуелсіздікке ұмтылған рухын айқындайтын басты мереке.
Күзгі Бурабай туристердің жаңа бағытына айналмақ — jananews.kz
