Мемлекет басшысы Қасым-Жомарт Тоқаев Қазақстанға ресми сапармен келген Лаос Президенті Тхонглун Сисулитпен кеңейтілген құрамда келіссөз өткізді.
Бұл – Лаос басшылығының елімізге жасаған алғашқы сапары. Президент бұл оқиғаны екі ел арасындағы байланыстарды нығайтуға тың серпін беретін маңызды қадам ретінде бағалады. Келесі жылы Қазақстан мен Лаос арасындағы дипломатиялық қарым-қатынастың орнағанына 30 жыл толады. Тараптар саяси, сауда-экономикалық, көлік-логистика және мәдени-гуманитарлық салалардағы ынтымақтастықтың перспективаларын талқылады.
Сауда-экономикалық әлеует және көлік-логистика
Келіссөз барысында елдер арасындағы тауар айналымын арттыру және өзара тиімді бағыттарды дамыту мәселелеріне ерекше назар аударылды. Қазақстан Лаос нарығына металл, тағам, мұнай химиясы, ауыл шаруашылығы, химия өнеркәсібі, машина жасау және фармацевтика өнімдерін тасымалдауға дайын.
Президент Қазақстанның транзиттік әлеуетін атап өтіп, лаостық жүк тасымалдаушыларға Қытайдың Ляньюньган, Сиань және Грузияның Батуми порттарындағы қазақстандық терминалдар мен логистикалық хабтарды пайдалануды ұсынды.
Мемлекет басшысы Лаос компанияларын «Астана» халықаралық қаржы орталығының (АХҚО) жеңілдіктерін пайдаланып, Қазақстан нарығына шығуға және Орталық Азиядағы қызметін кеңейтуге шақырды.
Лаос Президентінің пікірі мен кадр даярлау мәселесі
Лаос Президенті Тхонглун Сисулит Қазақстанды Орталық Азиядағы ізгі әрі орнықты қарым-қатынас жасаған сенімді серіктес ретінде атап өтті. Лаос басшысы Қазақстанның ұлт-азаттық күрес кезінен бері көмек көрсетуде екенін айрықша ризашылықпен жеткізді. Лаостың жүздеген азаматы Қазақстан жоғары оқу орындарында білім алып, бүгінде өз елдерінде мемлекеттік қызмет пен түрлі салаларда басшылық қызметтер атқарып жүргенін мәлімдеді.
Келіссөз қорытындысы бойынша мемлекет басшылары екіжақты ынтымақтастықты одан әрі кеңейтуге мүдделі екенін растайтын Бірлескен мәлімдемеге қол қойды.
Шыңғыс Әрінов Алматы облысының әкімі болып тағайындалды — jananews.kz
