Қытайдың Шыңжаң-Ұйғыр автономиялық өлкесінің әкімшілік орталығы Үрімжі қаласында 14-16 қыркүйек аралығында Шанхай ынтымақтастық ұйымының (ШЫҰ) цифрлық экономика жөніндегі форумы өтеді.
Бұл туралы Синьхуа ақпарат агенттігі хабарлады. Ауқымды халықаралық іс-шараға ШЫҰ-ға мүше мемлекеттердің үкімет өкілдері, жетекші сараптамалық орталықтар, ірі технологиялық компаниялар, жоғары оқу орындары мен салалық қауымдастықтардан шамамен 500 делегат қатысады.
Форум бағдарламасы мен негізгі талқылау тақырыптары
Қытай Мемлекеттік деректер басқармасы басшысының орынбасары Юй Иннің мәліметінше, форум аясында бірқатар стратегиялық мәселелер қарастырылады. Мүше мемлекеттердің салалық министрлері цифрлық саладағы үкіметаралық байланыстарды талқылап, 2026–2027 жылдарға арналған цифрлық экономика саласындағы ынтымақтастықтың басым бағыттарының тізімін бекітеді.
4 тақырыптық қосалқы форум:
— Цифрлық байланыстылық пен электронды сауданы дамыту;
— Көлік-логистикалық дәліздерді цифрландыру;
— Өнеркәсіпте цифрлық және зияткерлік технологияларды қолдану;
— Цифрлық басқару және адами капиталдың цифрлық дағдыларын арттыру.
Форум алаңында компаниялар арасындағы келіссөздер жүргізіліп, қатысушылар жергілікті инновациялық кәсіпорындар мен цифрлық жобалардың жұмысымен танысады.
ШЫҰ-ның цифрлық күн тәртібі
Соңғы жылдары ұйым аясында цифрландыру және жоғары технологиялар бағытына баса мән берілуде. 2025 жылғы қыркүйекте Қытайдың Тяньцзинь қаласында өткен саммитте ШЫҰ-ға мүше мемлекеттердің көшбасшылары цифрлық экономиканы дамыту туралы арнайы бірлескен мәлімдеме қабылдаған болатын. Үрімжідегі жиын сол уағдаластықтарды практикалық тұрғыда жүзеге асырудың негізгі алаңына айналмақ.
Мемлекет басшысы Төтенше жағдайлар министрін қабылдады — jananews.kz
