Қазақстан Президенті Қасым-Жомарт Тоқаев Астанаға ресми сапармен келген Куба Республикасының Вице-президенті Сальвадор Вальдес Месамен екіжақты кездесу өткізді. Мемлекет басшысы бүгінгі жиынға қатысқаны үшін мәртебелі мейманға ризашылығын білдіріп, еліміз Кубаның ЕАЭО қызметіне қосқан үлесін жоғары бағалайтынын жеткізді.
Цифрландыру және жасанды интеллект саласындағы тәжірибе алмасу
Кездесу барысында тараптар заманауи технологиялық трендтер мен оларды мемлекеттік басқару жүйесіне енгізу мәселелерін талқылады. Президент Еуразиялық экономикалық форумда талқыланған жасанды интеллектіні дамытудың өзектілігін айтып, осы саладағы екіжақты ынтымақтастықты кеңейту перспективасына тоқталды.
Мемлекет басшысы еліміздегі экономиканың негізгі салаларын цифрландыру және оған жасанды интеллект технологияларын енгізу шаралары туралы мәлімет берді. Осы орайда, Қазақстанның Куба тарапымен электрондық үкіметті дамыту тәжірибесін бөлісуге, озық цифрлық шешімдерін экспорттауға әзір екенін растады.
Сауда-экономикалық және медициналық байланыстар
Куба Республикасының Вице-президенті Сальвадор Вальдес Меса Қасым-Жомарт Тоқаевқа Куба Президенті Мигель Марио Диас-Канель Бермудестің ыстық сәлемін жеткізді. Ол Куба билігінің Қазақстанмен өзара сауда-экономикалық байланысты арттыруға ниетті екенін айтты. Кездесуде серіктестіктің келесідей басым бағыттары қарастырылды:
— Тараптар кездесуде медицина және фармацевтика бағытында тиімді ынтымақтастықты жандандыру әлеуетіне баса назар аударды.
— Бұдан бөлек, қос ел арасындағы іскерлік және мәдени-гуманитарлық қатынастарды тереңдету мүмкіндіктері жан-жақты қарастырылды.
Кездесу соңында Қазақстан Президенті мен Куба Вице-президенті халықаралық күн тәртібіндегі ең өзекті мәселелер жөнінде өзара пікір алмасты.
Елбасы: Еліміздің түкпір-түкпірінде 650-ден астам «ақылды» фермалар жұмыс істеп тұр — jananews.kz
