Елордада халықаралық талаптарға толық сәйкес келетін, биологиялық қауіпсіздігі жоғары деңгейдегі жаңа зертханалық кешен салынады.
Бұл туралы Үкімет отырысында Денсаулық сақтау министрі Ақмарал Әлназарова мәлімдеді, — деп хабарлайды jananews.kz.
ДДСҰ-ның 3-ші деңгейі және фармацевтика саласының жетістіктері
Үкімет отырысында атап өтілгендей, биыл сәуір айында Қазақстан Дүниежүзілік денсаулық сақтау ұйымының реттеуші жүйелерінің 3-ші деңгейіне қол жеткізді. Бұл ұлттық реттеу жүйесінің тұрақты жұмыс істейтінін және халықаралық стандарттарға сай екенін көрсетеді. Маңыздысы, Қазақстан — ТМД елдері арасында мұндай жоғары дәрежеге ие болған алғашқы мемлекет. Бұл жетістік отандық дәрі-дәрмектердің экспорт көлемін арттыруға және фармацевтика саласына шетелдік инвестициялар тартуға жол ашады. Ендігі негізгі мақсат – ең жоғары 4-ші деңгейге қол жеткізіп, елімізді өңірлік халықаралық өндірістік хабқа айналдыру.
Жаңа зертханалық кешеннің маңызы
Астанада бой көтеретін заманауи зертхана осы стратегиялық мақсаттарды іске асыруға бағытталған. Жаңа кешенде вакциналар мен дәрілік заттарға сынақтар жүргізіліп, олардың сапасы мен қауіпсіздігіне тәуелсіз бағалау жасау мүмкіндіктері айтарлықтай кеңейеді.
ДСМ мәліметінше, биыл 28 қыркүйекте «VL» ЖШС-мен «Зертханалары бар дәрілік заттар мен медициналық бұйымдарды сараптау орталығын» салуға арналған жобалық-сметалық құжаттаманы әзірлеу бойынша келісімшарт жасалған. Бұл жұмыстар алдағы жылдың 30 сәуірінде аяқталады деп жоспарлануда.
Енді ауыл шаруашылығы өнімдері маркетплейстер арқылы өткізіледі — jananews.kz
