Алматы қаласының Бостандық ауданында кәсіпкерлік қауымдастық өкілдерімен әлеуметтік әріптестік аясында ауқымды жұмыстар атқарылуда.
6 қараша күні ауданда бизнес өкілдерінің қаржылай қолдауымен жаңартылған бес қоғамдық кеңістікті таныстыруға арналған баспасөз туры өтті, — деп хабарлайды jananews.kz.
2026 жылғы инвестициялар және ауданды дамыту жоспары
Бүгінгі таңда Бостандық ауданында бизнестің әлеуметтік жауапкершілігі аясында 27 жоба жүзеге асырылуда. Оның 13-і толық аяқталса, 14 жоба бойынша жұмыстар жалғасуда. Бұл бастамаларға бағытталған инвестициялардың жалпы көлемі 2,8 миллиард теңгеден асады. Әкімдік пен кәсіпкерлердің өзара серіктестігінің арқасында бұрын қараусыз қалған бос аумақтар заманауи аллеялар мен демалыс орындарына айналуда.
Баспасөз туры барысында таныстырылған 5 жаңа нысан:
«Shuaq» аллеясы (Серкебаев көшесі, 103)
Ұзындығы 550 метр болатын бұл аумақта серуендеу жолдары, субұрқақ, балалар мен спорт алаңдары, әткеншектері бар бастырмалар орнатылған. Арнайы тапсырыспен «Аманат дәні» инсталляциясы қойылып, ұлттық нақыштағы ою-өрнектермен безендірілген. Жер көлемі шамамен 4 мың шаршы метрді құрайды. Инвесторы «DAC City LTD» ЖШС компаниясы.
Инклюзивті балалар алаңы (Серкебаев көшесі, 83)
Аумағы 450 шаршы метр болатын бұл алаң жақын маңдағы «Шапағат» орталығында оңалту курсынан өтіп жатқан, соның ішінде мүгедектер арбасымен қозғалатын балаларға арнайы жабдықталған. Арнайы көпіршелер мен өткелдер барлық баланың ойынға тең қатысуына мүмкіндік береді. Мүмкіндігі шектеулі балалар ешкімнің көмегінсіз өздері ойнай алады, бұл ата-аналар үшін де қуанышты жаңалық болды.
Байқадамов көшесінің бойындағы жаяу жүргіншілер аймағы
Серкебаев көшесінен Жароков көшесіне дейінгі аралықта жаяу жүргіншілер жолы жаңартылып, төсемтастары ауыстырылды, автоматты суару жүйесі мен жаңа жарықтандыру бағаналары қойылған.
Абай даңғылы мен 20-ші желі көшесінің қиылысындағы аллея
Мұнда 650 шаршы метр гранит плитка төселіп, 1 836 шаршы метр аумаққа көгал егілді. Сондай-ақ 30 жарықтандыру бағанасы, 12 орындық, қоқыс жәшіктері, сонымен қатар автоматты суару және су бұру жүйелері орнатылды.
Назарбаев даңғылы бойындағы аллея (№235 және №229 үйлер арасы)Үш тұрғын үй ауласын қамтитын жоба аясында жаңа плитка төселіп, балалар мен демалыс алаңы жабдықталды, заманауи жарықтандыру, автоматтандырылған суару жүйелері қойылып, түрлі ағаштар мен бұталар отырғызылды.
Тұрғындар мен басшылық пікірі
Бостандық ауданының әкімі Азамат Қалдыбеков кәсіпкерлер қауымдастығымен бірлесіп атқарылып жатқан жұмыстардың маңыздылығын атап өтті. Аймақ басшысы алдағы уақытта «Shuaq» аллеясын Розыбакиев көшесіне дейін ұзартып, Алматы қаласының бірыңғай дизайн-коды мен тұжырымдамасына сай жаяу жүргіншілер көшесін қалыптастыру жоспарда бар екенін жеткізді.
Өз кезегінде жергілікті тұрғындар бұрын қоқыс жиналатын қараусыз орындардың қысқа мерзім ішінде балалар мен ересектерге арналған әсем де жайлы демалыс аймағына айналғаны үшін қала әкімдігі мен кәсіпкерлерге алғыстарын білдірді.
Витилиго ауруын емдейтін дәріні мақұлдаған алғашқы ел — БАӘ — jananews.kz
