Қазақстандық футбол жанкүйерлері үшін тарихи сәт орын алды. Алматының «Қайраты» UEFA Чемпиондар лигасының негізгі кезеңінің шешуші, сегізінші турында әлемдік футболдың алыбы – Лондонның «Арсеналына» қонаққа барды. 60 мың жанкүйер сыятын әйгілі «Эмирэйтс» стадионында өткен тартысты бәсекеде қазақстандық клуб 2:3 есебімен есе жібергенімен, азулы қарсыласқа лайықты қарсылық көрсете білді.
Ойынның басы алматылықтар үшін салқын душ қабылдағандай басталды. Ағылшындық клуб өз алаңындағы басымдықты бірден байқатып, небәрі 2-минутта есеп ашты. Виктор Дьёкерештің соққысы нысанаға дәл тиді. Алайда, «Қайрат» футболшылары абдырап қалмады. Араға бес минут салып, 7-минутта алматылық клубтың шабуылшысы Жоржиньо таразы басын теңестірді. Қарсылас қорғаушылары оны шалып жығып, белгіленген пенальтиді шабуылшы мүлтіксіз орындады. Бұл гол командаға сенім сыйлап, психологиялық қысымнан арылуға көмектесті.
Дегенмен, АПЛ-дың үздіктері саналатын лондондықтар қысымды үдете түсті. 15-минутта Кай Хаверц, ал 33-минутта Габриэл Мартинелли мергендік танытып, есепті 3:1-ге жеткізді. Екінші кезеңде де «Арсенал» допқа иелік етіп, ойын тізгінін ұстауға тырысқанымен, «Қайрат» қорғаныста сауатты ойнап, қарымта шабуыл мүмкіндіктерін іздеді. Осындай талпыныстың нәтижесінде, ойынның соңғы секундтарында, 93-минутта Рикардиньо есеп айырмасын қысқартып, матчтың нүктесін қойды.
Матчтан кейінгі баспасөз мәслихатында «Қайрат» ФК бас бапкері Рафаэль Уразбахтин бұл ойынды команданың еуропалық сапарының лайықты қорытындысы деп бағалады.
«Біздің футбол ертегіміз аяқталды. Біз үздік командалармен ойнап, топ-клубтарды Қазақстанға әкелдік. Жігіттер алаңда барын салады деп уәде берген едім, олар сөзінде тұрды. Біз бұл матчты және жалпы турнирді абыроймен өткіздік», — деді бас бапкер.
Шындығында, «Қайраттың» биылғы еурокубоктық жолы оңай болған жоқ. Команда «Реал Мадрид», «Интер», «Бавария» сынды грандтармен иық тірестірді. Ал қарсылас «Арсенал» болса, бұл кезеңде «Атлетико Мадрид» (4:0) пен «Баварияны» (3:1) ойсырата жеңген, бабы келісіп тұрған ұжым еді. Осындай қарсыласқа сырт алаңда екі гол соғу – қазақстандық футболдың өсіп келе жатқанының, ойыншылардың тәжірибе жинақтағанының көрінісі.
Уразбахтиннің айтуынша, команданың Чемпиондар лигасына қатысуы елдегі футболға деген қызығушылықты арттырып, жас футболшыларға үлкен мотивация берді. Лондон төріндегі матч «Қайрат» тарихындағы жарқын беттердің бірі ретінде қалары сөзсіз.
Сауд Арабиясының тақ мұрагері «Барселонаға» 10 млрд еуро ұсынбақ: Мәміле жүзеге аса ма?
