Түркістан облысында жылына 150 мың тонна жүгері өңдейтін зауыт жұмысын бастады

Түркістан облысының Шардара ауданында «Қазкрахмал» ЖШС-нің жүгеріні терең өңдеу зауыты іске қосылды.

Жаңа өндіріс орнының жылдық қуаты 150 мың тонна шикізат өңдеуге қауқарлы, ал кәсіпорын толық іске қосылғанда 500 адам тұрақты жұмыспен қамтылады, — деп хабарлайды jananews.kz.

Заманауи технология және 28 түрлі өнім

ҚР Ауыл шаруашылығы министрлігінің мәліметінше, зауыт іс жүзінде қалдықсыз өндірісті қамтамасыз ететін заманауи жабдықтармен қамтылған — мұнда жүгеріні өңдеу тереңдігі 98%-ға жетеді. Өндіріс орнының өнім шығару жоспары бойынша модификацияланған крахмал, глютен, сығынды, целлюлоза және өзге де негізгі өнім түрлері өндіріледі. Тауар ассортименті 28 атауға дейін кеңейіп, мальтодекстрин, меласса, түрлі сироптар және сабақтас салаларда сұранысқа ие терең өңделген өнімдер шығарылады.

Кәсіпорынды шикізатпен үздіксіз қамтамасыз ету үшін Түркістан облысында жүгері егіс алқаптары кезең-кезеңімен ұлғайтылып, тамшылатып суару жүйелері енгізілуде. Су ресурстары шектеулі өңір үшін күрішпен салыстырғанда суды әлдеқайда аз қажет ететін жүгері дақылын өсіру тиімді шешім болып отыр.

Қазақстанда астықты терең өңдеу әлеуеті артып келеді

Премьер-министрдің орынбасары — ұлттық экономика министрі Серік Жұманғариннің айтуынша, соңғы үш жылда елімізде дәнді дақылдың жылдық өнімі 24 миллион тоннадан асты. Бұл көрсеткіш шикізат экспортымен шектелмей, ел ішінде қосылған құны жоғары өнім өндірісін дамытуға мүмкіндік береді.

«Бүгінде Қазақстанда жалпы қуаты жылына 510 мың тонна астықты терең өңдейтін үш кәсіпорын жұмыс істейді. Биыл Жамбыл облысында қуаты жылына 500 мың тонна жүгеріні өңдейтін Fufeng Group кешенінің бірінші кезегі іске қосылды. Бұдан бөлек, Ақмола, Қостанай облыстары мен Астана қаласында тағы төрт ірі инвестициялық жоба қолға алынған. Жаңа өндірістік қуаттар ел ішінде астық шикізатын жылына 5,8 млн тоннаға дейін терең өңдеуді қамтамасыз етеді», — деді Серік Жұманғарин.

Қазақстан алғаш рет Шуман форумына қатысты — jananews.kz

СОҢҒЫ ЖАҢАЛЫҚТАР

ЖАРНАМАspot_img