Алматы қаласының туристік әлеуетін арттыруда орталық аудандардың рөлі ерекше. Биыл шаһардағы ең көркем әрі тарихи аймақтардың бірі саналатын Медеу ауданын абаттандыру жұмыстары жаңа қарқынмен жалғасады.
Жыл соңына дейін мұнда қоғамдық кеңістіктер мен туристік инфрақұрылымды дамытуға бағытталған бірнеше ірі ауқымды жоба іске асырылмақ. Бұл туралы Өңірлік коммуникациялар қызметінде өткен арнайы брифингте аудан әкімі Еркебұлан Оразалин мәлімдеді. Экология мен заманауи урбанистиканы ұштастырған бұл жоспарлар қала тұрғындары мен қонақтарына барынша жайлы орта қалыптастыруды көздейді.
«Медеу» паркіндегі жаңа маршрут және туристік әлеует
Статистикаға сүйенсек, Медеу ауданы қаланың негізгі туристік орталығы ретіндегі көшбасшылық орнын нық сақтап тұр. Мәселен, тек 2025 жылдың өзінде ғана аудан аумағына шамамен 649 мың адам келіп, табиғат аясында демалыстарын өткізген.
Бұл бағытта өткен жылы сәтімен жүзеге асқан ең үздік жобалардың бірі ретінде жаңартылған «Терренкур» жолағын атауға болады. Бүгінде бұл орын салауатты өмір салтын ұстанатын қала тұрғындарының сүйікті демалыс орнына айналып, мұнда келушілердің саны күн санап артуда. Осы сәтті тәжірибені негізге ала отырып, биыл ірі табиғи аймақ – «Медеу» паркінің аумағын дамыту жоспарланып отыр. Жоба аясында ұзындығы 6 шақырымды құрайтын жаңа жаяу жүргіншілер бағыты салынып, адамдар көп шоғырланатын негізгі тартылыс нүктелері бар қоғамдық кеңістіктер толықтай абаттандырылады. Бұл қала экологиясына нұқсан келтірмей, табиғи туризмді дамытуға үлкен серпін береді.
Орталық көшелердегі жаяу жүргіншілер аймағы
Медеу ауданын абаттандыру жоспары тек тау бөктерімен шектелмейді. Қаланың қақ ортасында орналасқан көшелер де заманауи талаптарға сай түрленеді. Атап айтқанда, Жолдасбеков пен Меңдіқұлов көшелерінде кешенді жөндеу жүргізіліп, жаяу жүргіншілер аймағы кеңейтіледі. Мұнда көгалдандыру жұмыстары жүргізіліп, жайлы қоғамдық кеңістіктер құрылады.
Сонымен қатар, тарихи Зенков көшесінің Гоголь көшесінен Мақатаев көшесіне дейінгі 450 метрлік бөлігі де толығымен жаңартылмақ. Бұл учаскеде автокөлік қозғалысына кедергі келтірмейтіндей етіп, ашық аспан астындағы дәмханалар мен демалыс орындары бар жайлы жаяу жүргіншілер аймағы пайда болады.
«Халық қатысатын бюджет» жобасының шарапаты
Ауданды дамытуда тұрғындардың тікелей қатысуына да үлкен мән берілген. «Халық қатысатын бюджет» бағдарламасы аясында 2026 жылы барлығы 31 жобаны іске асыру көзделіп отыр. Бұл жобалардың қатарында 10 көпқабатты үйдің ауласын күрделі абаттандыру, 8 қоғамдық кеңістікті жаңарту және жасыл желектерді күтіп-ұстауға арналған 13 автоматты суару жүйесін орнату жұмыстары бар. Тұрғындардың өздері таңдаған бұл жобалар қалалық ортаның жайлылығын арттырып қана қоймай, ауданның эстетикалық келбетін жақсарта түседі.
