Мемлекет басшысы Қасым-Жомарт Тоқаев Мәжіліс Төрағасы Ерлан Қошановты қабылдады. Кездесу барысында Палата Спикері Президентке конституциялық реформаларды заңнамалық тұрғыдан қамтамасыз ету бағытында атқарылған жұмыстар мен заң шығару қызметінің қорытындыларын баяндады.
Конституциялық заңдар және қабылданған құжаттар
Ерлан Қошановтың мәлімдеуінше, Парламент жаңа Ата заңның нормаларын іске асыруға негіз болатын жеті конституциялық заңды сапалы әрі мерзімінде қабылдады.
Осы уақытқа дейінгі заң шығару ісінің негізгі нәтижелері бойынша қабылданған құжаттардың қатарында «Президент туралы», «Құрылтай және оның депутаттарының мәртебесі туралы», «Қазақстан Халық Кеңесі туралы», «Қазақстан Республикасы астанасының мәртебесі туралы» және «Алатау қаласының арнаулы құқықтық режимі туралы» заңдар бар.
Мәжіліс сессиясы басталғаннан бері жалпы саны 89 заң қабылданып, Парламент Сенатына жіберілді. Олардың ішінде Құрылыс және Цифрлық кодекстер, жасанды интеллект, банк қызметі, педагог мәртебесі, жемқорлыққа қарсы іс-қимыл және мемлекеттік наградалар туралы маңызды құжаттар қамтылған. Қазіргі уақытта депутаттардың жұмыс өндірісінде 80 заң жобасы жатыр. Онда жаңа Конституцияның қабылдануына байланысты рақымшылық жариялау, жол қозғалысындағы қауіпсіздік пен цифрландыру, жергілікті өзін-өзі басқару және машина жасау саласын дамыту мәселелері қарастырылған.
Сессия соңына дейінгі жоспарлар және парламенттік дипломатия
Мәжіліс төрағасы палатаның сессия соңына дейінгі негізгі бақылау және тыңдау шараларының жоспарын да тізбелеп өтті. Палата Үкімет пен Жоғары аудиторлық палатаның былтырғы республикалық бюджеттің игерілуіне қатысты есебін, ғылымды қаржыландырудың тиімділігін және депутаттардың өңірлерге сапары кезінде сайлаушылардан түскен өтініштер бойынша Үкіметтің ақпаратын тыңдауды көздеп отыр.
Сонымен қатар, кездесуде парламенттік дипломатияның даму барысы сөз болды. Президентке ТүрікПА, ТМД Парламентаралық ассамблеясы және өзге де халықаралық ұйымдармен өзара ықпалдастық жұмыстарының қорытындылары баяндалды. Мәжіліс өз қызметінде заң шығару ісінің ашықтығына және Қоғамдық палата отырыстары арқылы сарапшылар қауымдастығымен тығыз жұмыс істеуге баса мән береді.
Елімізде енді шегірткемен күрес үшін авиация мен дрондар пайдаланылады — jananews.kz
