Қазақстан студенттік қалалардың тартымдылығы мен білім беру сапасы бойынша Орталық Азиядағы көшбасшылық орнын нығайта түсті.
QS Best Student Cities 2027 халықаралық рейтингінде Алматы мен Астана өз көрсеткіштерін айтарлықтай жақсартып, әлемдегі студенттер үшін ең қолайлы қалалар тізімінде жоғары сатыларға көтерілді. Бұл туралы Қазақстан Республикасы Ғылым және жоғары білім министрлігінің баспасөз қызметі хабарлады.
QS Best Student Cities 2027 рейтингіндегі көрсеткіштер
QS Quacquarelli Symonds халықаралық талдау агенттігі жариялаған QS Best Student Cities 2027 рейтингінде отандық мегаполистер мынадай нәтижелерге қол жеткізді:
Алматы қаласы рейтингте бірден 13 сатыға көтеріліп, әлем бойынша 78-орынға тұрақтады. Бұл — Қазақстан қалаларының аталған рейтинг тарихындағы ең жоғары нәтижесі әрі Орталық Азия өңіріндегі абсолюттік рекорд. Ал ел астанасы 8 сатыға жоғарылап, 119-орынды иеленді.
Осылайша, Қазақстанның қос басты қаласы өңірдегі шетелдік және отандық студенттер үшін ең тартымды білім беру орталықтары ретіндегі мәртебесін бекітті.
Рейтингті бағалау критерийлері және қолжетімділік
Халықаралық QS Best Student Cities рейтингі әлем қалаларын алты негізгі көрсеткіш бойынша бағалайды. Олардың қатарында университеттердің академиялық беделі, қаланың тартымдылығы, түлектердің еңбек нарығындағы сұранысы, білім алу мен өмір сүрудің қолжетімділігі, студенттік қауымдастықтың халықаралық құрамы және студенттердің жеке пікірлері бар. Биылғы зерттеуге QS World University Rankings 2027 рейтингіне енген жоғары оқу орындары бар әлемдегі 150 қала енгізілген.
Алматының жоғары көрсеткішке жетуіне қаладағы жоғары білім беру жүйесінің қарқынды дамуы ықпал етті. Қазір Алматыда QS World University Rankings 2027 рейтингіне енген 9 университет орналасқан. Соның нәтижесінде қала «Университеттердің рейтингтердегі нәтижелері» көрсеткіші бойынша әлемде 50-орынға көтерілді.
Орталық Азия елдері қазақстандық астықты көбірек сатып ала бастады — jananews.kz
