ҚР Премьер-министрінің орынбасары – Ұлттық экономика министрі Серік Жұманғариннің төрағалығымен Үкіметте өткен кеңесте Бизнесті қолдау және сүйемелдеу орталықтарын (БҚСО) құру тұжырымдамасы таныстырылды.
Бұл туралы Үкіметтің баспасөз қызметі хабарлады. Пилоттық жоба «Даму» кәсіпкерлікті дамыту қорының өңірлік филиалдары базасында «бір терезе» қағидаты бойынша жүзеге асырылады.
Бизнесті қолдау орталықтарының негізгі міндеттері
«Даму» қорының басқарма төрағасы Фархат Сәрсекеевтің айтуынша, қазіргі таңда кәсіпкерлер мемлекеттік қолдау тетіктерін пайдаланғанымен, құқықтық немесе қаржылық қиындықтар туындағанда нақты қайда жүгінерін білмей жатады. Орталықтарды құру кезінде «Атамекен» ҰКП проблемалық мәселелер тізілімінен шағын және орта бизнестің 2,4 мыңнан астам өтініші талданды. Оның 600-ден астамы пилоттық өңірлерге тиесілі. Кәсіпкерлерді көбіне қаржыландыруға қол жеткізу, берешекті қайта құрылымдау, салық, өнімді өткізу, кәсіпкерлік құзыреттерді дамыту және агроөнеркәсіптік кешен (АӨК) сабақтастығы толғандырады. Орталықтардың тиімділігі тек консультация санымен емес, оң шешімін тапқан мәселелердің нақты үлесімен бағаланады.
Жоба жүзеге асырылатын 5 пилоттық өңір
Бизнесті сүйемелдеудің жаңа тетігі алғашқы кезеңде еліміздің 5 ірі аймағында ұйымдастырылады:
-
Астана қаласы
-
Алматы қаласы
-
Шымкент қаласы
-
Солтүстік Қазақстан облысы
-
Ақтөбе облысы
