Шетелде және Қазақстанда тұратын қандастарға еліміздің жоғары оқу орындарына түсу үшін қолайлы жағдайлар жасалған.
Грант конкурсына қатысу кезінде қандастар үшін шекті балл жинау міндетті емес, — деп хабарлайды jananews.kz.
ҰБТ тапсыру тәртібі мен тіркелу жолдары
Шетелде тұратын қазақ ұлтының азаматтары Қазақстанның ЖОО-ларына түсу үшін Ұлттық бірыңғай тестілеуге қатыса алады. Тестілеуді қаңтар, наурыз, негізгі және тамыз айларында тапсыруға мүмкіндік бар. Шетел азаматтары ҰБТ-ға app.testcenter.kz сайты арқылы тіркеледі. Тестілеу құны – 5 640 теңге.
Қазақстан азаматының ЖСН-ы бар талапкерлер тиісті бөлімге өз нөмірін енгізеді (кәмелетке толмағандар үшін ата-анасының деректері көрсетіледі). Ал ЖСН-ы жоқ шетел азаматтары «ҚР ЖСН жоқ» бөлімін таңдап, жеке деректерін толтырады және оларға 12 таңбалы код беріледі.
Ақылы негізде оқуға түсуді жоспарлағандарға ҰБТ тапсыру міндетті емес – олар ЖОО-ға әңгімелесу нәтижесі бойынша қабылдана алады. Ал мемлекеттік грант конкурсына қатысу үшін негізгі ҰБТ-ны тапсыру қажет.
Қандай пәндерді тапсыру қажет?
ҰБТ пәндерінің саны оқу мерзімі мен таңдалған мамандыққа байланысты анықталады. Толық оқу мерзімі бойынша әдеттегі мамандықтарға – 3 пән, шығармашылық мамандықтарға – 1 пән, ал қысқартылған оқу мерзімі бойынша (колледж түлектеріне) әдеттегі мамандықтарға – 2 пән, шығармашылық мамандықтарға – 1 пән тапсырады (Шығармашылық емтихандарды талапкер таңдаған жоғары оқу орны өткізеді).
Қазақстанда оқитын қандастар үшін шарттар
Қазақстанда білім алып жатқан қандастар ҰБТ-ға «2027 жылғы мектеп түлектері» санаты бойынша тіркеліп, негізгі тестілеуді тегін тапсыра алады. Ең басты артықшылық – қандастар үшін грант конкурсына қатысу кезінде шекті балл белгіленбеген. Олар негізгі ҰБТ нәтижесінде қанша балл жинағанына қарамастан, мемлекеттік грант конкурсына қатысуға еркін өтініш бере алады.
