Айдарбек Сапаров: сатып алынатын техниканың 95%-ы отанымызда өндірілген

Биылғы күзгі жиын-терім науқанында Қазақстан бойынша 24,5 миллион тонна дақыл жиналды.

Бұл туралы Ауыл шаруашылығы еңбеккерлерінің ІІІ форумында Мемлекет басшысы Қасым-Жомарт Тоқаев мәлімдеді, — деп хабарлайды jananews.kz.

Президент диқандарға алғыс айтып, Үкіметке тапсырма берді

Мемлекет басшысы өз сөзінде ауыл шаруашылығының ел экономикасы үшін стратегиялық маңызы зор екенін атап өтіп, сала еңбеккерлерін кәсіби мерекелерімен құттықтады. Ауа райының қолайсыздығына қарамастан, биыл да ел қамбасы астыққа толды.

«Егіннің бітік болуы — молшылық пен тоқшылықтың кепілі. Бұл еліміздегі шаңырақтар ырысқа кенеліп, дастарқанымыз берекелі болады деген сөз. Мен бүгін диқандар қауымына және осы салада еңбек етіп жүрген барша азаматқа алғыс айтамын», — деді Қасым-Жомарт Тоқаев.

Сонымен қатар Президент форумда көтерілген су ресурстарын үнемдеу, жайылымдық жерлерді тиімді пайдалану және ауыл еңбеккерлерінің әлеуметтік жағдайын жақсарту жөніндегі ұсыныстарды Үкімет пен құзырлы министрліктер міндетті түрде назарға алуы тиіс екенін ескертті.

Сүт өндірісі мен отандық ауыл шаруашылығы техникасының өсімі

Форум барысында Ауыл шаруашылығы министрі Айдарбек Сапаров саладағы негізгі өндірістік жетістіктерді баяндады. Солтүстік Қазақстан облысының тәжірибесін тарату бағдарламасы аясында соңғы үш жылда елімізде сүт өндірісі 400 мың тоннадан астам көлемге ұлғайды. Заманауи сүт-тауар фермаларының іске қосылуы нәтижесінде алдыңғы қатарлы шаруашылықтар еуропалық деңгейге жетіп, бір сиырдан жылына орта есеппен 11–12 мың литр сүт саууда.

Биылғы 10 айда лизинг арқылы алынған комбайндар көлемі 21%-ға, тракторлар саны 16%-ға артты. Сатып алынатын техниканың 95%-ы отандық өнімдер. «АгромашХолдинг» компаниясы 10 айда 1 233 трактор құрастырса, «Казрост Инжиниринг» кәсіпорны 262 комбайн шығарып, 2025 жылғы көрсеткішті 72%-ға асыра орындады.

 

Таңбалау жүйесі қай салада тәртіп орнатты? — jananews.kz

 

СОҢҒЫ ЖАҢАЛЫҚТАР

ЖАРНАМАspot_img