Қазақстанда тауарларды міндетті түрде цифрлық таңбалау жүйесі өз тиімділігін көрсетіп отыр.
Орталық коммуникациялар қызметі алаңында өткен брифингте Сауда және интеграция вице-министрі Әсет Нүсіпов бұл бағыттағы атқарылған жұмыстар мен алдағы жоспарларды жария етті, деп хабарлайды jananews.kz.
Дәріханалардағы тексеру нәтижелері
2024 жылғы 1 шілдеден бастап енгізілген цифрлық бақылау жүйесі нарықтағы заңсыз айналымды анықтауға мүмкіндік берді. Жүйе арқылы дәріханаларда заңсыз сатылған 26 мыңнан астам тегін дәрілік қаптама тіркелді. Нәтижесінде 31 ұйымға жалпы сомасы 12 млн 300 мың теңге айыппұл салынып, 43 дәріханаға заң бұзушылықты жою туралы ресми нұсқама берілді.
Таңбалау тізімі қалай кеңейеді?
Вице-министрдің айтуынша, міндетті таңбалау тізімі алдағы жылдары кезең-кезеңімен кеңейтілетін болады. 2027–2029 жылдарға арналған кесте тізіміне тұрмыстық химия, косметика, өсімдік майы және кондитерлік өнімдердің жекелеген түрлері кіреді.
2028 жылдан бастап балалар ойыншықтары, тез еритін сусындар, антисептиктер және азық-түлік тауарлары қосылады. Ал 2029 жылдан консервіленген өнімдер таңбалау жүйесімен қамтылады. Сонымен қатар биыл қыркүйек айында мұнай өнімдерін молекулалық таңбалау бойынша пилоттық жоба басталды. Бұл технология отынға арнайы маркер қосу арқылы оның сапасы мен шығу тегін мобильді анализаторлар көмегімен тексеруге жол ашады.
Тұтынушылар үшін тиімділігі
Мемлекеттік өкіл бұл жүйе бизнеске ғана емес, қарапайым азаматтарға да үлкен көмек екенін атап өтті. Тұтынушылар «Нақты өнім» мобильді қосымшасы арқылы кез келген тауардың кодынан толық ақпарат алып, оның заңдылығын тексере алады. Жүйенің кеңеюі азаматтардың сапалы өнім таңдауына және заңсыз айналымға қарсы тұруына толық мүмкіндік береді.
Астанада Орталық Азиядағы алғашқы AI-Enabled университет ресми түрде ашылды — jananews.kz
