Қазақстан Республикасының Премьер-министрі Олжас Бектенов сингапурлық әлемге әйгілі «Changi Airport Group» компаниясының бас атқарушы директоры Ям Кум Вэнгпен кездесу өткізді.
Бұл туралы Үкіметтің баспасөз қызметі хабарлады. Кездесуде Мемлекет басшысы Қасым-Жомарт Тоқаевтың елімізде халықаралық мультимодальды авиациялық хаб қалыптастыру жөніндегі тапсырмасын орындау, елорданың қолданыстағы әуежай инфрақұрылымын жаңғырту және Астанадағы екінші әуежай құрылысы шеңберінде серіктестік орнату мәселелері талқыланды.
Changi Airport Group халықаралық тәжірибесі мен мүмкіндіктері
Сингапурлық алпауыт компания Қазақстанның әуе инфрақұрылымын халықаралық стандарттарға сай жетілдіруге өз сараптамасын ұсынуға дайын. Changi Airport Group Сингапурдағы атақты Чанги және Селетар халықаралық әуежайларын басқарады. Оның «Changi Airports International» еншілес құрылымы әлемнің 20-дан астам мемлекетіндегі 60-тан астам әуежайда инфрақұрылымды бас жоспарлау, салу және басқару жобаларын жүзеге асыруда. Компания жолаушыларға қызмет көрсетуді толық автоматтандыру, биометриялық сәйкестендіру жүйелерін енгізу және экологиялық көміртекті бейтараптық қағидаттарын сақтау бойынша көшбасшы саналады.
Астана — Еуропа мен Азия арасындағы транзиттік көпір
CAG басшысы Ям Кум Вэнг Астананың Еуразия кеңістігіндегі геостратегиялық әлеуетін жоғары бағалап, елорданың жаңа әуежайын толыққанды өңірлік орталық әрі экожүйе ретінде дамытуға ниетті екенін мәлімдеді. Жаңа әуежайды өңірлік логистикалық және жолаушылар хабына айналдыру үшін сингапурлық мамандардың тәжірибесі тартылады. Ынтымақтастық тек терминал салумен шектелмей, заманауи карго, транзиттік дәліздер мен коммерциялық сервистерді біріктіретін бірыңғай авиациялық кластерді қамтиды.
Енді балалардың медициналық қортыныдылары ата-аналарға қолжетімді болады — jananews.kz
