2025 жылдың күзінде мерзімді әскери қызметін аяқтаған жастар үшін жоғары оқу орындарынан жалпы 1 040 білім беру орны бөлінді.
Бұл туралы Астанада өткен ведомствоаралық комиссия отырысында белгілі болды, — деп хабарлайды jananews.kz.
Гранттардың бөліну тәртібі мен әлеуметтік кепілдіктер
Қорғаныс министрлігінің баспасөз қызметі таратқан мәліметке сәйкес, бөлінген орындар келесідей санаттарға ажыратылған:
800 орын – Ғылым және жоғары білім министрлігі ұсынған мемлекеттік білім беру гранттары;
240 орын – күштік құрылымдардың жоғары оқу орындарындағы тиісті орындар.
Үміткерлерді іріктеу жұмыстары «Срочники 2.0» цифрлық платформасы арқылы ашық түрде жүргізілді. Жалпы бұл конкурстық іріктеуге 160 әскери бөлімнен 8 823 әскери қызметші қатысқан. Рейтингті қалыптастыру кезінде сарбаздардың жауынгерлік даярлық нәтижелері, әскери тәртіп деңгейі, қызметтік міндеттерін орындау сапасы, психологиялық даярлығы және тестілеу қорытындылары қатаң ескерілді. Конкурс қорытындысы мен жеңімпаздардың сертификаттары «Срочники 2.0» платформасында жарияланды.
Мемлекет тарапынан әскери қызметін аяқтап, ЖОО-ға түсетін жастарға қосымша әлеуметтік кепілдіктер қарастырылған. Атап айтқанда, оларға оқудың алғашқы жылында жатақханадан басымдықпен орын беріледі және шәкіртақы төленеді.
Білім беру бағыттары
Қазіргі уақытта әскерден оралған азаматтарды жоғары оқу орындарында даярлау жұмыстары еңбек нарығындағы сұранысқа сәйкес ақпараттық-коммуникациялық технологиялар (АКТ), инженерлік және құрылыс мамандықтары, ауыл шаруашылығы және биоресурстар, ветеринария және қызмет көрсету саласы бағыттары бойынша жүргізіледі. Бұл бастама әскери қызметтің беделін арттырып, сарбаздардың азаматтық өмірде де сұранысқа ие маман атануына зор мүмкіндік береді.
