Қазақстанда денсаулық сақтау саласын цифрландырудың сапалы жаңа кезеңі басталды.
Енді жекелеген процестерді цифрландыру тәсілінен бас тартып, азаматтың медициналық тарихы кез келген емдеу мекемесіне қолжетімді болатын бірыңғай цифрлық экожүйе қалыптастырылуда. Бұл туралы Құрылтай депутаттарының сауалына берген жауабында Денсаулық сақтау вице-министрі Тимур Сұлтанғазиев мәлім етті, — деп хабарлайды jananews.kz.
Бірыңғай цифрлық экожүйенің мақсаттары мен артықшылықтары
Вице-министрдің айтуынша, жаңа цифрлық архитектура үш негізгі қатысушының – азаматтың, медициналық ұйымның және мемлекеттің өзара іс-қимылы негізінде құрылады. Негізгі мақсат – толығымен пациентке бағдарланған денсаулық сақтау жүйесін құру. Азаматтың медициналық тарихы ол баратын медициналық ұйымның қандай ақпараттық жүйені пайдаланатынына қарамастан, қажетті сәтте толық қолжетімді болады. Дәрігерлердің әртүрлі цифрлық жүйелерге бірдей мәліметтерді қайталап енгізуіне қажеттілік қалмайды, барлық деректер бірыңғай ортада жинақталады. Сонымен қатар медициналық көмек көрсету үдерістерінің, саладағы жалпы ахуал мен қолда бар ресурстардың бірыңғай айқын көрінісі қалыптасады.
Алдағы жоспарлар мен мерзімдер
Жүйелік өзгерістер аясында қолданыстағы цифрлық платформалардың техникалық мүмкіндіктеріне талдау жасалып, қажетті өзгерістер кезең-кезеңімен іске асырылуда. Ең маңызды меже – 2026 жылдың желтоқсанында шашыраңқы жүрген бөлек-бөлек медициналық цифрлық жүйелер e-Densaulyq бірыңғай экожүйесіне толықтай топтастырылатын болады. Бұл қадам отандық медицина сапасын арттырып, көрсетілетін қызметтерді жедел әрі ашық етуге мүмкіндік береді.
Алматыда медициналық суреттер сақталатын бірыңғай цифрлық архив құрылды — jananews.kz
