Қазақстанда су ресурстарын қорғау мен ұтымды пайдалану бағытында маңызды қадам жасалды.
Су ресурстары және ирригация министрлігі мен «Ұлттық волонтерлік желі» заңды тұлғалар бірлестігі экологиялық волонтерлікті дамыту саласындағы ынтымақтастық туралы меморандумға қол қойды, — деп хабарлайды jananews.kz.
Меморандумның негізгі мақсаты мен бағыттары
Құжатқа Су ресурстары және ирригация вице-министрі Талғат Момышев пен «Ұлттық волонтерлік желі» бірлестігінің атқарушы директоры Татьяна Миронюк қол қойды. Су нысандарын сақтау, экологиялық волонтерлікті дамыту және халық арасында суға ұқыпты қарау мәдениетін қалыптастыру бағытында күш біріктіру. Ел өңірлерінде экологиялық акциялар, білім беру семинарлары мен тренингтер ұйымдастыру, азаматтардың экологиялық жауапкершілігін арттыру және су үнемдеу қағидаттарын кеңінен насихаттау.
Вице-министр Талғат Момышев бұл құжат қоғам өкілдерін елдің су ресурстарын сақтау жұмыстарына кеңінен тартып, жүйелі шараларды жалғастыруға мүмкіндік беретінін атап өтті.
«Болашақтың қайнары» қозғалысының бастамалары
Бұған дейін Су ресурстары және ирригация министрлігінің бастамасымен су саласындағы тұңғыш волонтерлік қозғалыс – «Болашақтың қайнары» құрылған болатын. Оның құрамына Тараз қаласындағы Қазақ ұлттық су шаруашылығы және ирригация университетінің студенттері енді. Қозғалыс мүшелері «Таза Қазақстан» жалпыұлттық бастамасы аясындағы «Мөлдір бұлақ» экологиялық акциясына қатысып, бұлақтарды тазарту, қалпына келтіру, аумағын абаттандыру және көшет отырғызу жұмыстарын жүргізді. Жаңадан жасалған меморандум волонтерлік қозғалыстың ауқымын кеңейтіп, республика бойынша су ресурстарын қорғау мен үнемдеу мәдениетін дамытуға тың серпін бермек.
