Қазақстан Дүниежүзілік зияткерлік меншік ұйымының (ДЗМҰ) 2026 жылғы Жаһандық инновациялық индексінде (Global Innovation Index, GII) айтарлықтай ілгерілеу көрсетті.
Еліміз әлемнің 139 экономикасы арасында 81-орыннан 73-орынға шығып, соңғы 10 жылдағы ең жоғарғы нәтижесін тіркеді, деп хабарлайды jananews.kz.
Өңірлік және халықаралық көрсеткіштер
Өңірлік көрсеткіш бойынша Қазақстан Орталық Азия елдері арасында 1-орынға ие болды. Орталық және Оңтүстік Азия елдері арасында 11 экономиканың арасында 2-орынды еншіледі.
Табысы орташадан жоғары 35 елдің ішінде Қазақстан 17-орынға орналасты.
Ең елеулі ілгерілеу инновациялық нәтижелер бойынша байқалды. Инновациялық нәтижелер субиндексі (Innovation Outputs) бірден 11 сатыға көтеріліп, 84 орыннан 73-орынға шықты, ал инновациялық ресурстар субиндексі бойынша (Innovation Inputs) 75 орыннан 73-орынға жақсарды.
Жетістікке жеткізген жүйелі жұмыстар
GII 2026 нәтижелері Женевадағы ДЗМҰ штаб-пәтерінде мүше мемлекеттердің тұрақты өкілдеріне арналған алдын ала таныстырылым барысында ұсынылды. Рейтинг көрсеткіштерінің жақсаруына ұлттық және халықаралық деңгейде жүргізілген жүйелі жұмыстар негіз болды:
- 2026 жылы Қазақстанның Женевадағы Тұрақты өкілдігі ДЗМҰ-мен тікелей өзара іс-қимыл орнатып, нақты индикаторлар мен деректердің сапасына басымдық берді.
- ДЗМҰ сарапшылары мен отандық мемлекеттік органдардың қатысуымен онлайн-консультациялар ұйымдастырылып, қолданыстағы статистикалық мәліметтер жан-жақты талқыланды.
- Халықаралық статистиканың сапасын арттыру және көрсеткіштердің дұрыс көрсетілуін қамтамасыз ету бағытында мазмұнды жұмыстар атқарылды.
Алға қойылған ауқымды міндеттер мен қол жеткізілген табыстарға қарамастан, алдағы уақытта ғылыми-зерттеу жұмыстарына жұмсалатын шығыстарды арттыру, университеттер мен бизнестің өзара іс-қимылын күшейту, венчурлік қаржыландыруды дамыту және инновациялық кластерлерді жетілдіру бағыттарында әлі де өсу әлеуеті бар.
4 қазаннан бастап Алматыда эвакуацияланған көліктерді сақтау үшін ақы алынады — jananews.kz
