Алматы қаласында денсаулық сақтау саласын цифрландыру бағытында маңызды жоба іске қосылды.
Мегаполисте орталықтандырылған телерадиологиялық жүйе іске қосылып, медициналық суреттер сақталатын бірыңғай цифрлық архив құрылды, — деп хабарлайды jananews.kz.
Жаңа жүйенің мүмкіндіктері мен артықшылықтары
Қалалық Қоғамдық денсаулық сақтау басқармасының мәліметінше, бұл жүйе дәрігерлерге түрлі медициналық ұйымдарда түсірілген пациенттердің диагностикалық суреттерін бір орталықтан көруге толық мүмкіндік береді. Енді тұрғындар басқа емханаға немесе ауруханаға барған кезде рентген суреттері мен дискілерді өздерімен бірге алып жүруге мәжбүр емес. Қазірдің өзінде жүйеге 69 медициналық ұйым мен 216 диагностикалық аппарат қосылып үлгерді. Цифрлық архивте 800 мыңнан астам зерттеу нәтижесі жинақталып, 1 миллионнан астам науқас тіркелді.
Жаңа жүйе медициналық суреттерді 25 жылға дейін сақтай алады. Бұл дәрігерлерге әр жылдары жүргізілген тексеру нәтижелерін өзара салыстырып, науқастың денсаулығындағы өзгерістерді дұрыс бақылауға жол ашады. Бұл жаңалық, әсіресе, онкологиялық, жүрек-қан тамырлары және басқа да созылмалы аурулары бар, үнемі дәрігер бақылауында болуды қажет ететін науқастар үшін аса маңызды.
Қамтылатын бағыттар мен алдағы жоспарлар
Алматы қаласы Қоғамдық денсаулық сақтау басқармасының басшысы Марат Пашимовтың айтуынша, жүйе сәулелік диагностиканың негізгі бағыттарын толық біріктіреді. Олардың қатарында рентгенография, флюорография, маммография, компьютерлік және магниттік-резонанстық томография (КТ мен МРТ) және ангиография бар. Қазірдің өзінде жүйемен жұмыс істеу үшін рентгенолог дәрігерлерге арналған 113 жұмыс орны мен сонша диагностикалық монитор орнатылып, небәрі үш айдың ішінде жүйеде 600 мыңнан астам зерттеу тіркелді.
Алдағы уақытта 2026 жылдың соңына дейін ТМККК (тегін медициналық көмектің кепілдік берілген көлемі) және МӘМС (міндетті әлеуметтік медициналық сақтандыру) пакеттері аясында қызмет көрсететін жекеменшік клиникаларды да осы бірыңғай жүйеге қосу тапсырылды.
Елімізде балабақша ауыстырудың жаңа тәртібі енгізілмек — jananews.kz
